லெபனான் மீது இஸ்ரேல் படையெடுப்பு.

சிறிய நாடான இஸ்ரேல் அதனிலும் சிறிய நாடான லெபனானை கடுமையாகத் தாக்கிக்கொண்டிருக்கிறது.

கோல்டா மேய்யரின் (1968ல் இஸ்ரேலின் பெண் பிரதமர்) "ஆறுநாட்போரில்" கைப்பற்றிய லெபனானின் பெரும்பகுதியை விட்டு 1986ல் இஸ்ரேல் வெளியேறியது. அப்போதிலிருந்து இப்போதுவரை அந்நாட்டிற்கு பேர் சொல்லும்படியான படைபலம் கிடையாது. சிரியா நாட்டின் படைதான் பாதுகாத்து வந்தது. இந்நிலையில், லெபனானின் முன்னாள் பிரதமர் ரஃபீக் ஹரீரி சென்றவருடம் பெய்ரூட் நகரில் வைத்து வெடிகுண்டு தாக்குதலுக்கு பலியானார். இச்சம்பவத்திற்கு சிரியநாட்டின் ராணுவமே காரணம் என்று மக்கள் புரட்சி செய்ய, சிரிய ராணுவமும் லெபனானை விட்டு வெளியேறிவிடுகிறது. இன்று ஹெஸ்புல்லாஹ் (இறைவனின் கட்சி) என்ற இயக்கம்தான் தென் லெபனானை பாதுகாக்கிறது. இது அமெரிக்காவினால் தடை செய்யப்பட்ட இயக்கம். ஆனால் இது 2005ல் நடைபெற்ற பொதுத்தேர்தலில், 128 பேர் கொண்ட நாடாளுமன்றத்தில் 23 இடங்களைக் கைப்பற்றியது. இவர்களுக்கு சிரியா மற்றும் இரானுக்கு தொடர்பு உண்டு என்று நம்பப்படுகிறது.

ஹெஸ்புல்லாஹ் கடத்திச் சென்ற இரு ராணுவ வீரர்களை விடுவிக்கவும், அவ்வப்பொழுது வட இஸ்ரேலிய நகரங்களின் மீது பாயும் சிறிய ஏவுகணைத்தாக்குதலுக்கு முற்றுப்புள்ளி வைக்கவும் இந்த படையெடுப்பு தேவையென இஸ்ரேல் காரணம் கூறுகிறது. வான்வெளித்தாக்குதலால் தென்கோடியிலிருந்து வடகோடி வரைக்கும் எதிர்ப்பின்றி, குண்டுமழை பொழிந்து கொண்டிருக்கிறது. வலுவான வான் பாதுகாப்பு ஏற்பாடுகள்(air defence system)கூட லெபனானில் இல்லை.

ஹெஸ்புல்லாஹ் இரு இஸ்ரேலிய வீரர்களுக்கு பணயமாக இஸ்ரேலிய சிறைகளில் 25 வருடங்களுக்கும் மேலாக வாடும் எண்ணற்ற பாலஸ்தீனிய, லெபனானிய கைதிகளின் விடுதலையைக் கோருகிறது. இதுவரையிலும் 10க்கும் மேற்பட்ட இஸ்ரேலிய ராணுவ வீரர்களும், 100க்கும் மேற்பட்ட (இஸ்ரேலிய, லெபனானிய) பொதுமக்களும் கொல்லப்பட்டிருக்கின்றனர்.

பன்னாட்டு அரசியல் நோக்கர்களின் பார்வையில், இப்போர் - இஸ்ரேல் அமெரிக்க துணையுடன், சிரியா மற்றும் ஈரான் நாட்டைத்தாக்கும் போருக்கான ஆயத்தம் என நம்பப்படுகிறது.

குறிப்பு:
லெபனான் மக்கள் அரபியர்கள். இஸ்லாமியர்களும், கிறித்தவர்களும் சேர்ந்து வாழ்கிறார்கள். இவர்களது பெயர்களை வைத்து 'இவர் எந்த மதம்' என்று அறிவது மிகக் கடினம். எண்ணெய் வளம் கிடையாது(அதான் ஒருத்தரும் கண்டுக்கலையா?).